මේක ඇතුලේ ඕනෑම දෙයක් හොයා ගන්න මේක පාවිච්චි කරන්න

Friday, December 16, 2011

රැකියා අවස්තාවක් (විශ්වාස වන්තයකු සඳහා පමණයි )

ඔන්න කාලෙකට පස්සේ අද තමයි පොස්ට් එකක් දාන්න නිවාඩුවක් හම්බ උනේ. මොකද මෙතුමාට  හදිස්සියේ විදේශ රැකියාවක් ලැබිලා යන්න උන නිසා මෙතුමා මේ දවස්වල ඉන්නේ මාල දිවයිනේ. ඉතින් කලින් බාගෙට ලියලා තියන පොස්ට් එකවත් ඉවර කරගන්න හම්බුනේ නැ ඔන්න. හරි කොහොමින් කොහොම හරි ඔන්න අද සිකුරාදා නිවාඩු දවසෙත් වැඩ කරන තැනට රිංගගෙන පොඩියෙන් හරි මොකවත් ලියලා දාන එක තමයි අදහස. මේක ලියන්න ප්‍රධානම හේතුවක් උනේ කාට හරි අත දෙන්න තියෙන කැමැත්තම තමයි. හැබැයි වෙන තරමක් උනේ දුන්නට පස්සේ දීපු අත හපපු එක තමයි. කමක් නැ මේ සැරෙත් එකම උනදෙන් කියලා හිතාගෙන ඔන්න දානවා විස්තරේ පත්තරේ.

මම මේ වැඩ කරන්න අපු තැනට තවත් කෙනෙක් වැඩට ගන්න අවස්ථාවක් ලැබිලා තියෙනවා. ඉතින් මෙතන ඉන්න මගේ ලොක්කත්  ලංකාවේ කෙනෙක් නිසා අපි දෙන්නගෙම අදහස ලංකාවේ කෙනෙක්ම මෙතනට ගන්න. මේ ගන්න කෙනාගේ කැපවීම මත තවත් කෙනෙක් මෙතනට ගන්න පුළුවන් වෙයි කියන බලාපොරොත්තුවෙන් තමයි අපි ලංකාවේ කෙනෙක්ම ගෙන්න ගන්න හිතුවේ. හැබැයි ආයතනයේ අදහස ඉන්දියන් ජාතිකයෙක් වැඩට ගන්න මොකද ඉන්දියන් ජාතිකයින් කිසිම කොන්දේසියකින් තොරව අඩු පඩියට වැඩට එන්න සුදානමින් ඉන්නේ.  හරි වැඩි විස්තර ඔන්න මෙහෙමයි. 

මම වැඩ කරන ආයතනය මේ රටේ තියන ප්‍රධාන ආයතන වලින් එකක්. ඉතින් මෙතනට ඕන වෙලා තියනවා Sales manager කෙනෙක්  හෝ Salesgirl කෙනෙක්. මෙතන විකුනන්න තියෙන්නේ Mobile Phones .  බොහොම පහසු වැඩ මුරයක් තමයි තියෙන්නේ කොටින්ම කීවොත් ලංකාවේ අපි වැඩ කරන විදිහට නිකන්ම තමයි ඉන්න තියෙන්නේ. හරියටම පැය 8.00 විතරයි වැඩ. නවාතැන් පහසුකම් ආයතනය විසින් සපයනවා. කෑම බීම වියදමින් 2/3 ක් ආයතනය සපයනවා. ඉතිරි 1/3 ක අපේ පඩියෙන් දෙන්න ඕන. සමහරු නම් ආයතනයෙන් දෙන කෑම වියදමින්ම මාසේ ශේප් කරගන්නවා. "ගල්, පොල්,  මල් " මොනවත් නැති නිසා වෙන කිසි වියදමක් නම් නැ. දෙයියනේ කියල ගන්න පඩිය ඉතිරි කරන්න පුළුවන්.    

සුදුසුකම් වෙන්නේ මෙන්න මේවයි
පිරිමි කෙනෙක් නම් හොඳ English දැනුමකුයි Tamil  ටිකක් හරි කතාකරන්නයි පුළුවන් වෙන්න ඕන. පරිගණක සහ ජංගම දුරකථන පිලිබඳ දැනුමකුත් තියෙන්න ඕන. පොඩි electronic දැනුමකුත් තියෙනවනම් එක ලොකු වාසියක්. Phone ගැන පිස්සුවක් තියනවනම් හොඳටම හොඳයි. අනිත් ඒවා ඉතින් ඔය හැමෝම බලන සුදුසුකම් තමයි.  අලවි කරණය ගැන මහා ලොකු දැනුමක් ඕන නැ නමුත් එන මනුස්සයකුට හොඳින් කතා කරලා අවශ්‍යතාව තේරුම් අරගෙන වැඩ කරන්න පුළුවන් නම් ඒ ඇති. 

ගැහැණු කෙනෙක් නම්   හොඳ English දැනුමක් අනිවා.  Tamil  ටිකක් හරි කතාකරන්න පුළුවන් නම් ගොඩ . පරිගණක  පිලිබඳ දැනුමකුත් තියෙන්න ඕන. අනිත්ව පෙර පරිදිම තමයි. electronic දැනුමක් අවශ්‍ය නැ. දන්නවනම් ගොඩම ගොඩ.  


හොඳින් තේරුම් ගන්න මේක තනතුරු දෙකක් බව. බය වෙන්න දෙයක් නැ හොඳ සාම කාමී පරිසරයක තමයි වැඩ කරන්න තියෙන්නෙත් ඉන්න තියෙන්නෙත්. බොහොම විනෝදයෙන් ඉන්න පුළුවන්. විශ්වාසයෙන් වැඩ කරන්න පුළුවන් කෙනෙක් විතරයි ඕන නැත්නම් ගෙන්න ගත්ත මමයි අපු කෙනයි දෙන්නම pack කරලා ගෙදර ......හරිය.

හැමෝටම දැනගන්න ඕන ඇතිනේ පඩිය. පිරිමි කෙනාට ලක්ෂ බාගෙකට ටිකක් වැඩි පඩියක් ගන්න පුළුවන් වෙයි. ගැහැණු කෙනාට අරට වඩා ටිකක් අඩු පඩියක් තමයි ලැබෙන්නේ ඒවා ගැන වැඩි විස්තර කතා කරන්න පුළුවන්. 

කැමති කවුරු හරි ඉන්නවනම්   itnishantha@yahoo.com       එකට mail කරන්න පුළුවන් skype id එකකුත් එවන්න අමතක කරන්න එපා. 
  
          

Friday, November 25, 2011

ගැස්ට්‍රික් නම් මෙන්න බෙහෙත ...... අත්දුටුවයි ! සත්තයි !

ඔන්න හැමෝගෙම කෑම හදන බ්ලොග් ටික කියවලා මටත් හිතුනා ඒ වගේ දෙයක් ලියන්න කියලා. මේක  ගොඩක් ප්‍රයෝජනවත් වෙයි ඔන්න ඔය මාතෘකාවේ තියන ලෙඩේ තියන අයට නම්. ඕක ලෙඩක් කීවට මට නම් හිතෙන්නේ දාගත්ත ලෙඩක් කියලා ඉබේම ඕක හැදුන අය ඇත්තේ බොහොම ටික දෙනෙක් මගේ හිතේ  හැමෝම කියන්නේ "වැඩ වැඩ  කන්නවත් කෝ වෙලාවක්" කියලා. මෙතන තියන ප්‍රශ්නය කන්න වෙලාවක් නැති එකම  නෙවේ. 
       ගොඩක් වෙලාවට දවල්ට කන්න බැරි උනා කියලා ගැස්ට්‍රික් හැදෙනවට වඩා මේක දරුනුවටම හැදිලා තියෙන්නේ උදේට කන්නැති අයට රෑ එළිවෙනකන් පැය 8 විතර අපි කිසිම ආහාරයක් නොගෙන ඉන්නේ. එහෙම ඉඳලා උදේම 'පුන්නකු බාල්දියක් විතර ගොන් කිරි එකක් බීලා දවල් දහය විතර වෙනකන් මුකුත්ම නොකා ඉන්න තමයි වැඩි දෙනෙක් හුරුවෙලා' තියෙන්නේ.

     මොකද ගොඩක් අය හිතාගෙන ඉන්නේ අපි හරක් පැටවූ නිසා  හරක් කිරි බීපුවාම හරි කියලා. එහෙමනං ඉතින් දහයට විතර කන්න ලපටි තණකොළ ටිකකුත් වැඩට යනකොට ගෙනිච්චට වරදක් නැ. 
මේ ගොන් පුරුදු හින්දා   ඉතින් ගැස්ට්‍රික් හැදෙන එක අරුමයක් නෙවේ. මේකට කරන්න තියන හොඳම දේ  ' උදේම බොන පුන්නක්කු  බාල්දිය නවත්තලා හොඳට කන එක තමයි'. 

"අනේ ඔච්චර උදේ කන්නේ කොහොමද ?  මටනම් උදේම කන්න බැ වමනෙට වගේ එනවා "          ඔන්න ඕව තමයි උදේම කන්න කීවොත් කට්ටිය කියන කතා. 

      මේකට ප්‍රදාන හේතුව තමයි අපි දත් මදින දත් බෙහෙත් හැමෝම දත් මදින්න පාවිච්චි කරන්නේ Mint සහිත ඔය ප්‍රසිද්ද දත් බෙහෙත් වර්ගනේ. හොඳින් මතක තියා ගන්න ඔය Mint  කියන්නේ තාවකාලිකව ස්නායු හිරි වට්ටන දෙයක්  එතකොට දිවට කිසි රසයක් දැනේනේ නැ.  ඒ හින්දා තමයි තිත්ත බෙහෙත් බොන්න කලින් Hax වගේ ටොපියක් කාල ඉන්න කියන්නේ එතකොට තිත්ත  රස දැනෙන්නේ නැ. ඒ විතරක් නෙවේ දත් මැදලා කට හෝදන කොට උදේම  සීතල වතුර පාවිච්චි කරන්න එපා. අයිස් කැටයක් කටේ තියාගෙන හිටියත් වෙන්නේ ඔය දේම තමයි. ඒ හින්දා "සුපිරි විකී" වගේ දත් බෙහෙතක් පාවිච්චි කරන්න. ඒකේ තියන ලුණු ඇඹුල් රස නිසා කටේ ස්නායු සංවේදනය වෙලා කටට කෙල උනන එක වැඩි වෙනවා. දත් මැදලා කට හෝදනකොට මදක් උණුසුම් වතුර පාවිච්චි කරන්න එතකොට දත් බෙහෙත් රසය කටෙන් හොඳට ඉවත් වෙලා ස්නායු හොඳින් Worm-up වෙනවා. එතකොට නිකන්ම උදේම බඩගිනි එනවා. 
           අන්න ඒ වෙලාවට මෙන්න මේ පහලින් තියන කෑම ජාතිය හදාගෙන  කාල යන්න. එක දිගට සතියක් කරලා බලන්න. සාර්ථක නැත්නම් හොදවාගෙන් දෙකක් කියලා  දාන්න කොමෙන්ට් එකක්. කිසි ප්‍රශ්නයක් නැ. හැබැයි ඔං වැඩේ හරියට කරලා බලලා හරිද. 
මගේ දෙමවුපියන්ට පින් සිද්ද වෙන්න මට නම් ඔය කිසි ලෙඩක් හැදුනේ නැ. උදේම කන්න පුරුදු කරා විතරක් නෙවේ ඔය ගෝ කිරි බොන පුරුද්දත් අඩු කරලා උදේම කොළ කැඳ එකක් ඉරමුසු ටිකක් වගේ බොන්න පුරුදු කරා. ඒ මිනිස්සු බුදු වෙන්න ඕන අදත් උණක් හෙම්බිරිස්සාවක්වත්  නැ. ඇත්තම කියනවනම් මට හරි ආසයි ලෙඩක් හැදිලා ඇඳකට වෙලා ගෙදර අයගෙන් පොඩි සැලකිල්ලක් ගන්න. කරුමේ කියන්නේ වැස්සට තෙමුනත්, අවුවට වෙලුනත්, ගලේ ගැහුවත් කිසි ලෙඩක් හැදෙන්නේ නැ නොවැ. ඔහෙලා කීවට පිළිගනීද මන්දා දැනට අවුරුදු 13 කින් මම පැනඩෝල් පෙත්තක් බීල නැ කියපුවහම. 

හා හා ඔය මදැ විස්තරේ. ඔන්න එහෙනම් එදා සිංහලයාගේ ජනප්‍රියතම පාතරාසය "දිය බත් " හදන හැටි.

අවශ්‍ය දෑ :- රාත්‍රියේ උයා ඉතිරි උන බත් ටිකක් 
                  එයට දැමීමට බත් වැසෙන තරමට ජලය 
                  පොල් බෑවක්
                  රතුළුණු ගෙඩි 5-6 ක් හෝ රටලුණු ගෙඩි 1 ක්
                  වියලි මිරිස් කරල් 5-6 ක් 
                  දෙහි ගෙඩියකින් බෑවක් 
                  ලුණු අවශ්‍ය පමණට
                  සුද්ද කරපු පොල් කූරක්                

අපේ ගෙවල් වල සාමානයෙන් කෑම හදන කොට ගෙදර ඉන්න අයට ගානට හදන්නේ නැ නොවැ. හදිසියෙවත් කවුරු  හරි අවොත් කියලා තවත් මනුස්සයකුට ඇති මදි වෙන තරමට ටිකක් වැඩියෙන් තමා උයන්නේ පිහන්නේ. සිංහලයා එදා ඉඳන් ආගන්තුක සත්කාරයට ප්‍රසිද්දයි නොවැ. කන බොන වෙලාවට ගෙදරට එන බලු කුක්කට වත් කෑම කටක් නොදී ගෙදර මිනිස්සු කාපු නැති ජාතියක් උන අපි අද නම් වැඩියෙන්ම කරන්නේ ඉල්ලගෙන කන එක තමා. හා ඒවා ගැන කතා කරන්න ගියොත් කියන්න යන දේ කියන්න බැරි වෙන හින්දා මෙන්න මෙහෙම කරන්න.
 රෑට  කාපුවාම ඉතිරි වෙන බත් ටික දැනට නම් අපි පහුවදා උදේම කන්නේ නැ ඔකේ නිකන් සීතල ගතියක් එක්ක පොඩි පරණ රසක් එන නිසා ඕක එක්කෝ වීසි කරනවා නැත්නම් ඉතින් "හොඳමදේ දරුවන්ට දීලා හැමදාම ඉතිරිවෙන දේ කන අපේ අම්ම කනවා". කරන්න තියෙන්නේ මෙන්න මේ ඉතිරිවෙන බත් ටිකට වතුර ටිකක් වත් කරලා තියන එක විතරයි. හබැයි වතුර දානකොට දාන්න ඕන බත් ටික වැහෙන තරමට විතරයි. මහා ගොඩක් වක්කරනවා එහෙම නෙවෙයි. පොඩි මැටි කොප්පෙකට(කරි මුඩි) බත් ටික දාල වතුර දාල හොඳට වහලා තියන්න. හැදුවට පස්සේ මේගැන මතක් උන නිසා ඔන්න පින්තුරයක් ගන්න නම් බැරි උනා. 
                     පහුවදා උදේ මේ බත් එක අරන් බලන්න අර දාපු වතුර උරාගෙන බත් ඇට ටිකක් පිම්බිලා තියෙනවා වතුරත් අඩුවෙලා තියෙන්නේ. දැන් කරන්න තියෙන්නේ පොල් ටිකක් ගාන එකයි. පොල් බෑවකින් 1/3 විතර ගාල උණුවතුර ටිකක් වෙන්න දාල හොඳ උකුවට මිටිකිරි තේ කෝප්ප 2/3 විතර හදා ගන්න.දිය කිරි වත් පොල්කිරි ගොඩක් වත් හදා ගන්න එපා එතකොට මේක වතුර ගතිය වැඩි වෙලා රස නැති වෙනවා. රතුළුණු  ගෙඩි 5 -6 ක් සුද්ද කරලා හීනියට ලියා ගන්න. රතුළුණු නැතිනම් රටළුණු ගෙඩියකින් 1/2 හෝ 2/3 හෝ උනත් කමක් නැ. හැබැයි රතුළුණු නම් රස වැඩියි.  

දැන් අර පොල්කූර අරගෙන අර වියලි මිරිස් කරල් ටික ඔය රුපයේ විදිහට අමුනගන්න. අමුණා ගත්ත මිරිස් කරල් ටික ලිපේ ගින්දරට අල්ලා වටේම කරකවමින් පුච්චා ගන්න. ඉස්සරහා ඒවා ඉක්මනට පිච්චෙන නිසා එලෙස පිච්චුන ඒවා ගලවා තියන්න. නැතිනම් ඒ  මිරිස් කරල්ටික අඟුරු වෙයි. මේ මිරිස් අතින් කුඩු කරන්න පුළුවන් ගානටයි පුච්චන්න ඕන. අඟුරු වෙනකන් පුච්චන්න එපා. ඔන්න රුපයේ පැහැදිලිව ඇති. සමහරු ඕකට අමු මිරිස් දානවා මම නම් අමු මිරිස් දානේ නැ අමු මිරිස් දාපුවාම කොළ රස එන නිසා.                    
                                                       

කපා ගත්ත රතුළුණු ටික, පුච්චලා කැබලි කරගත් මිරිස් ටික අර වතුර දාපු බත් එකට දාන්න. එකේ  තියන වතුර ඉවත් කරන්න එපා. දැන් මේකට අවශ්‍ය තරම් ලුණු දමන්න. බත් එකටත් ලුණු දාලනම් උයලා තියෙන්නේ ලුණු ටිකක් විතර දාන්න. දැන් මේකට පොල්කිරි ටික එකතුකරන්න සමහරු නම් පොල්කිරි ටිකක් රත් කරලා දානවා එහෙම ඕන නැ. පොල්කිරි නිකම්ම දාන්න. දැන් දෙහි බැව අවශ්‍ය තරමට මිරිකන්න රස අනුව. වැඩේ ඉවරයි. මේක සිම්පල් ප්ලැන් එකක්. දියකිරි, හරි මිටිකිරි, හරි ගොඩක් වැඩි උනොත් රස ටිකක් අඩුවෙයි. එ හින්දා බත් එක වැහෙන ගානට විතරක් දා ගන්න. මොකද රෑ දාපු වතුරත් බත් එකෙ තියනවා කියල අමතක කරන්න එපා. රෑ දාපු වතුර පෙරන්න එපා එතකොට කන්න වෙන්නේ රොඩ්ඩ විතරයි. 

එහෙ නම් කාල බලලා රස කියන්න. නැත්නම් අම්මට කිබුහුම් යන්න මට බනින්න.







 ඔන්න මම හදපු රුප ටික දැම්ම. හැමෝම කෑම හදපු රුප දැම්මට අන්තිමට ඒවාට උනේ  මොකද කියලා රුප දාල තිබුනේ නැති නිසා ඔන්න එකට උන දේ ගැනත් රුපයක් දැම්ම.





ප. ලි.
ඔය මං හදල තියන එකේ ටිකක් මිරිස් වැඩි මොකද මම ටිකක් සැර කෑම කන කෙනෙක් නිසා. ඔය ගැස්ට්‍රික් තියන අය ඔය තරම් මිරිස් දාන්න එපා. මේක සතියකට දවස් තුනක්වත් කන්න. කාල වෙනස බලන්න උගුර පිච්චීගෙන ඇසිඩ් ගතිය උගුරට එන එක මේවා කාල ගිය දවසට නැ කියලා තේරෙයි. ඒ වගේම මේක හොඳ ඇඟ නිවෙන කෑමක් කියලයි අපේ අම්ම මට හදලා දුන්නේ මොකද මම උෂ්ණ කාරයෙක් හින්දා. ඕව ගැන මම වැඩිය දන්නේ නැ හැබැයි කිසිම කෙඳිරියක් නැතිව ඔය වගේ දිය බත් එකක් බස්සන එකනම් මට කිසිම ප්‍රශ්නයක් නැතිව කරන්න පුළුවන්. ඔකේ ගුණ අගුණ ගැන විස්තර "වේද ගෙදර මහා වේදනා" නම් දන්නවා ඇති. උන්නැහ මේ පැත්තේ අවොත් ඔන්න ගුණාගුණ කියලා කොමෙන්ටුවක් දාල යන්න කියලා ඉල්ලනවා.     






Sunday, November 13, 2011

ජනකවියෙන් හෙළිවන අපේ රටේ ලිංගික නිදහස

සිංහල ජනකවිය විවිදාකාර මාතෘකා රැසක් සම්බන්දයෙන් වූ කවි වලින් පෝෂිත  වූ කලාවකි. ඒ ඒ අවස්ථාවල ජීවිතයට ලැබුනාවූ අත්දැකීම් හාස්‍ය රසයද සමග ඉදිරිපත් කර සමාජයට පණිවිඩයක් ලබා දීමට හැකි උනත් ජනකවියා යනු පොත පතින් ඉගැනුමක් ලැබුවෙකු නොවේ. නමුත් ජීවිත තක්සලාවෙන් ලැබුවා වූ උපාධිය සහිතව ඔහු විසින් සමාජයට දායාද කර ඇති සාහිත්‍යය එදා අද සහ හෙටත් අපගේ ජාතිය පෝෂණය කරනු නොඅනුමානය. එදිනෙදා ජීවන වෘත්තිය කරගෙන යාමේදී ලැබෙන්නාවූ අත්දැකීම් පමණක් නොව සමාජයේ අඩු පාඩු පවා සිවු පදයෙන් පවසූ  ඔහු තරම් ජීවිතය දෙස උපේක්ෂාවෙන් බැලුවකු තවත් සිටීදැයි සැක සහිතය. සුභාෂිත කවියේ මෙන්ම එළිසමය රිද්මය එලෙසම රැක ගනිමින් අවයාජව ජීවිතය ගැන ඔහු කියූ දෙය මෙලෙස සටහන් කරනුයේ අප අද කෙස් පැලෙන  තරම් තර්ක විතර්ක මැද කතා කරන්නාවූ දෑ ඔවුන් එදා දැක්කේ කෙසේදැයි මතු පරපුරට දන ගනු පිණිසමය.

පැල් රැකීම එදා ජන ජීවිතයේ තිබු ප්‍රධාන වෘත්තියට සම්බන්ද අනිවාර්ය රාජ කාරියක් විය. එහිදී සිදුවන්නාවූ අනියම් ඇසුරු පිලිබඳ බිරිය මෙන්ම සැමියාද දැනගෙන හිටි බවත් එවැනි කාරණා නිසා පවුල් ජීවිත අවුල් නොවූ  අයුරුත්  පහත කවි වලින් ගම්‍ය නොවන්නේද ?

අපේ පිරිමි පැල් යනවා             කියාලා 
පැලට ගිහින් ගිනි බෝකර         තියාලා 
එළිවෙන තුරා අඟු කොටු වල    රැකීලා
උදේට එයි පැල් ලැග්ගා           කියාලා     

අපේ ගෙදර උන්දා නම් බෝම            යසයි 
පැලට ආව විට උන්දැට වාසි           හොඳයි 
මන් නැති දාට තනියට දැලේ         දෙන්නයි 
මුනා කරත් මට සැලකිලි ඔහොම        තමයි                                                     

මේ චෝදනා පිලිබඳ පුරුෂයා ඉදිරිපත් කරන්නේද සාදාරන නිදහසට කරුණකි

අරළු කහට මුත් බොනවා ඇඟට        ගුනේ 
වෙරළු අමු කහට කන්නේ කවුද     සෙනේ 
බොරළු ගොඩ උපන් සක් සසඳ    හාමිනේ 
කොරල ඇඟ නිසයි උඹ මට එපා     උනේ  


අද මෙන්ම එදා සමාජයේද පුරුෂයන් දැපනේ දමාගෙන ජීවත් වූ අඟනන් සිටි බවත්. එවැනි අඟනකු වූ රන් මැණිකා නමැත්තිය පිලිබඳ සුවාමි පුරුෂයාද දැන සිටි බව මේ කවියෙන් නොපෙනේද ?

රන් මැණිකා උඹ කාටත් හැඩ               කාරී 
විස්ස පිරුණු කොල්ලෙක්වත් අත         නාරි
වැස්ස පින්න නොබලයි හොඳ කෙලි    කාරී 
පස්ස උඹේ යකඩින් හැදුවද                  බාරී 

එක්තරා මහලු පුරුෂයෙක් තරුණ ස්ත්‍රියක් විවාහ කරගෙන ගම තුල සිදුවන්නාවූ කැළඹීම ජන කවියා උපහාසයෙන් ප්‍රකාශ කලේ "කැළැ පත්තර " මගින් මෙසේය. එදා ගම තුල යමකට විරුද්දත්වය ප්‍රකාශ කිරීමේ ප්‍රධාන මාද්ධ්‍යය වූ මෙයට බොහෝ විට යොදා ගත්තේ කවියයි.


පුම්බා දෙමට හපමින් හුණු ගගා             තුඩේ
එල්ලගෙන ඉනේ තම්බිගේ රට            අමුඩේ 
ගෙම්බා මෙන් ඔහොම කුදහන් ඉඳන්     බුඩේ
අම්බා රැක ගන්න හැකිදෝ බලන්          නඩේ 


කැන්දා නොගෙන තා වැනි හොටියක    දිරුන
කොන්ද පන නැතිව අඹුවක් ගෙන         සරණ  
නින්ද නැති කොරන් ගැටවුන් හට        තරුණ
මන්ද බුඩේ තා ලත වෙන මේ               කරුණ 

කඩ කෙස් කෙලින් කර ගත්තත්             කුදය
විඩා වෙන බැවින් ඉක්මනටම                මදය 
ඩා ගෙන කන්ඩ බැරි කොට පැණි        වදය
බුඩේ මෝකැ  අඹුවට දෙන ඔය              වදය

සෙවල බැඳෙන්නට හැර අඹුගේ තුනු       විලේ 
ගෙවල යකා මෙන් රැක සිටිති හැම       වෙලේ 
තැවුල පමුනමින් තරුනන්ට හැම            කලේ 
වෙවුලමින් මොකද තා කරන           කලබලේ   


  

Monday, November 7, 2011

කඩු King සුද්දට පාර කිවූ හැටි

 ඔන්න ටික දවසකින් මොනවත් ලියන්න බැරි උන නිසා අරන් ආව මට අහන්න ලබූනු කතාවක්. කියපු එකත් ලෝක මඩෙක් හින්දා මෙක ඇත්තද මඩක්ද කියලා මටත් තවම හිතා ගන්න බැ.  කොහොම හරි ඔන්න සිද්දිය සිද්ද වෙලා දැනට අවුරුදු 10 විතර වෙනවා. 
ඒ කියන්නේ අපි ඉස්කෝලේ යන දවස්වල. ඒ දවස් වල අපි සෙට් එක තමයි නුවර ඔරලෝසු කනුව ළඟ හිටපු ලොකුම වල ගැන්සිය. ඉස්කෝල කීපයකම එපාම කරපු එවුන් ටිකේ එකතුවෙන් තමා ඕක හැදිලා තිබුනේ. කොච්චර බස් තිබුනත් හැමෝම පොත අත්සන් කරන්න වගේ ඔතනට ඇවිත් තමයි යන්නේ. ඔතන අපිට සෙට් වෙලා හිටිය තව ටවුන් ආරච්චිලා කීප දෙනෙකුත්. ඔකේ එකෙක් හිටිය උදේ 7 වෙනකොට ඔතෙන්ට ඇවිත් රෑ 7 විතර වෙනකම් චාටර් වෙලා යන එකෙක් අපි කියමු මුට රංග කියලා කියමු. හැමෝම කිවේ ටවුන් එකේ යතුර තියෙන්නේ රංග අතේ කියලා. මු නැත්නම් ටවුන් එක අරින්න බැ කියල හිතලද  මන්දා මු මෙ උදේම ටවුන්  එන්නේ. වෙන මොකවත් නෙවේ කාලකන්නි කම පස්සපැත්තට අවුව ටිකක් වැටෙනකන් වත් නිදා ගන්න මුට පින නැ.

 මුගේ තාත්තා වැඩ කරේ පොලිසියේ හැබැයි මු පොලිස් කාරයෙක් ගේ  පුතෙක් කියලා නම් කියන්නවත් බැ. නැබිලියක් මුනින් නැවුවා වගේ කොන්ඩේ කපලා  ඒ දවස් වල ජනප්‍රිය codroil බෙල් බොටම් එක ඇඳලා තඩි badge එකක් තියෙන බෙල්ට් එකක්  දාල කිට මරලා තමයි ටවුන්  බහින්නේ. ඒ විතරක්නම් බැරිය නිතරම කඩු කැලි වලින් තමයි කතාව. අහන්නෙත් කඩු සින්දු නිතරම මුමුනන්නෙත් කඩු සින්දු අපිටත් ඒ දවස්වල කඩුව තියා කැත්තක් වත් හරියට බැරි හින්දා මු ඉතින් හෙන පොර සේ  තමයි හිටියේ. මු කියපුව ඇත්තද බොරුද කියලවත් දැන ගන්න අපිටත් තේරෙනවය ඉතින්.  ඔන්න ඔහොම ඉන්නකොට දවසක් අපි ඉස්කෝලේ ඉද්දි තමයි මෙන්න මෙහෙම වෙලා තියෙන්නේ.

ඔන්න සුද්දෝ දෙතුන් දෙනෙක් කෝච්චියේ ඇවිත් තියනවා නුවරට. ඇවිත් කෝච්චියෙන් බැහැලා මුන් ටික එතන ඉඳන් කෙලින් පාර නිසා ඔරලෝසු කනුව ලඟට එනකන් කොහොම හරි ඇවිත්. මුන්ට යන්න ඕන වෙලා තියෙන්නේ මාලිගාවට. ඔන්න බොලේ ඔරලෝසු කනුව ලඟට ඇවිත් මුන් ටික map එකක් පෙරලගෙන දැන් බලනවලු මාලිගාවට යන පාර. සැහෙන වෙලාවක් බැලුවත් මුන්ට හොයාගන්න බැරි වෙලා යන පාර. දැන් මුන් ටික වට පිට බලනවලු කාගෙන් හරි පාර අහන්න. වට පිටේ මිනිස්සු බොහොම කලබලෙන් එහාට මෙහාට යනවා නැවතිලා ඉන්න අය ලඟට යනකොට උනුත් හෙමීට මාරු වෙනවලු       කඩ්ඩ බැරි නිසා.  අනේ මෙන්න මේ වෙලාවේ තමයි අපේ කතා නායකයා මුන්ට පිහිට වෙලා තියෙන්නේ. පිහිට උනා කීවට මු කර මුලටම අහු වෙලා මේ සුද්දෝ සෙට් එකට. මොකද මු දැකලා නැ සුද්දෝ ටික මෙතන ඉන්නවා. එතන බස් එකක හිටපු කෙල්ලෙකුට පැණි පාර දාගෙන ඒ ගැන සම්පුර්ණ අවදානයෙන් හිටපු නිසා සුද්ද මු ලඟට එනවා වත් දැකලා නැ. සුද්දත් මු ලඟට ඇවිත් තියෙන්නේ මු කඩු සින්දුවක් විසිල් කර කර හිටපු නිසා මු හොඳ කඩු කාරයෙක් කියලා හිතලා. ඔන්න ලඟට ඇවිත් මුගෙන් දැන් අහනවාලු මාලිගාවට යන පාර. මුට දැන් මාරු වෙන්නත් බැ කෙල්ල බලාගෙන මු දිහා. දැන් දාඩිය එහෙම දාල මු බලාගෙන ඉන්නවලු සුද්ද දිහා. සුද්ද දැන් ආයෙත් අහනවලු කොහොමද මාලිගාවට යන්නේ. මුට තේරෙනවා අහන්නේ මේකයි කියල එත් උත්තර දෙන්න වචන සෙට් කර ගන්න බැ. වටේ මිනිස්සුත් බලාගෙන එහෙන් සීන් කරන කෑල්ලත් බලාගෙන දැන් ඉතින් මොනවා හරි කියන්නත් එපාය. මු දැන් මාලිගාව දිහාට ඇත දික් කරලා කියනවලු.

First junction .. .... No Junction  (ඔය කියන්නේ ඔරලෝසු කනුව ළඟ ඉඳලා යනකොට හම්බෙන පළමු තුම්මන් හන්දිය white house hottel එක ළඟ)
You Go 

second junction .... No      junction  (ඔය කියන්නේ ඔරලෝසු කනුව ළඟ ඉඳලා යනකොට හම්බෙන දෙවැනි  තුම්මන් හන්දිය FoodCity  එක ළඟ)
You Go 
  
third junction . .. ... No junction  (ඔය කියන්නේ ඔරලෝසු කනුව ළඟ ඉඳලා යනකොට හම්බෙන තුන්වෙනි   තුම්මන් හන්දිය වැව රවුම )
You Go 

Fourth Junction අන්න Junction හැරෙනවා වමට 

Thursday, October 27, 2011

සිරිසේනට යකා වැහීම (පන්චේන්ද්රියන්ට අසු නොවන ගුප්ත සිදුවීම් )

මේක සත්‍ය සිදුවීමක් 
ඔන්න මේ පොස්ට් එක දාන්න හිතුනේ ගුනේ අයියගේ මිනිබිරීට ආච්චි වැහුනා පොස්ට් එක බැලුවට පස්සේ.
          මේ බ්ලොග් අවකාසේ ඇවිදිනකොට අනිත් අයගේ සිදුවීම් එක්ක අපේ මතකයත් අතීතෙට ගමන් කරනවා. මතක් වෙන හැමදේම ලියන්න ගියොත් මහා පතරංග ජාතකේ වගේ පොතක් ලියන්න වෙයි. නමුත් ඔන්න තදින්ම මතකයේ තියන දේවල් ලියලා දානවා හැමෝටම දැනගන්න.

ඔය සමහර අමනුස්සයෝ මිනිස්සුන්ගේ සරීර වලට ආවේශ වෙනවා කියන එකනම් මම එතරම්  පිළිගන්න කැමති දෙයක් නෙවේ. සමහරුන්ට ඔය දේව ආත්ම පවා ආවේශ වෙලා කියල කීවට මම නම් හිතන්නේ කිසිම වෙලාවක මිනිස්  ශරීරයකට කිසිම බලවත් ආත්මයක් නම් ආදේශ වෙන්නේනැ  කියලයි . "අසුචී මුට්ටියක් වගේ" කියලා උපමා කරපු අපේ කුණු සරීරයට අපට වඩා බලවත් අමනුස්සයෝ මොකට ඇලුම් කරනවාද? මම හිතන විදිහට පහත්ම ගනයේ ආත්ම තමා මේ ආවේශ වෙනවනම් මේ විදිහට අවේශ වෙන්නේ. 
               ඒවගේම මම දැකලා තියන දෙයක් තමා බොහෝ අවස්ථා වල සමාජයේ පහලම පන්තියේ අයට තමා මේ විදිහට මේ ආවේශ ඇතිවෙන්නේ. නුගත්, දිළිඳු සමාජය අතර බහුලවම මේ තත්වය දකින්න පුළුවන්. මද්ධ්‍යම පන්තිකයන් අතරත් පහල මද්ධ්‍යම පන්තිකයන් අතරත්  තමා මේ තත්වය බහුලව දකින්න පුළුවන් නුගත් ධනවතුන්  අතරත් මේ තත්වය කලාතුරකින්  දකින්න තියෙනවා. නමුත් උගත් සාමාජයේ මේ තත්වය බොහොම විරලයි. කලාතුරකින් දැක්කත් මේ තත්වය ඔවුන් සුව කර ගන්නේ බෙහෙත් හා මනෝ විද්‍යා උපදේශකයකු මගින්. තොවිල් පවිල් කරනවා දැකලා තියෙන්නේ බොහොම කලාතුරකින්. 

                         මොකද කුඩු කාරයාගේ ඉඳලා මහාචාර්ය මට්ටමට එනකන් විවිද පුද්ගලයෝ මම ආශ්‍රය කරන නිසා මේ ගැන හොඳ අවබෝදයක් මට තියනව කියලා මම හිතනවා. මම කවදාවත් දැකලා නෑ දෙවියකු හෝ යකෙකු වැහුන දොස්තර කෙනෙක්  , ලෝයර් කෙනෙක්, මහාචාර්ය වරයෙක්  හෝ දෙසපාලකයෙක් වගේ කෙනෙක්ව. කොහොම උනත් නුගත් හෝ බලවත් චිත්තාවෙගයන්ට ඔරොත්තු නොදෙන සිතක් ඇති අයට මේවගේ දේවල් මගින් සිත රවට්ට ගන්න පුළුවන් වීම තමයි මම හිතන විදිහට මේ තත්වය. මට නම් තවම යකෙක් බුතයෙක් දෙවියෙක් දකින්න අවස්තාවක් ලැබිල නැ. මගේ බලාපොරොත්තුව කවදා හරි මේ වගේ දෙයක් දකින එක තමයි. හැබැයි මම කවදාවත් මේ තත්වයන් ගැන පහත් විදිහට කතා කරන්නේ නැ. අර විමලරත්න කුමාරගම ගේ අයියනායක කවි පන්තියේ කියනවා වගේ "මම නොකෙරුවත් නොකලෙමි එය ගැරහීම " තමයි මගේ ප්‍රතිපත්තිය. මොකද ඔය අපේ පන්චේන්ද්‍රයන්ට ගෝචර නොවෙන ගොඩක් දේවල් ලෝකයේ සිද්ද වෙනවා. 

    මම පාසල් ගිහින් ඉවර උන අලුතම වගේ මට හාමුදුරු නමක් ආශ්‍රය කරන්න හම්ඹුනා. උන්වහන්සේ පිළිගත් ජෝතිෂ වේදියෙක්. මම උන්වහන්සේත් එක්ක තර්ක කරලා කීව මම ඔය ග්‍රහ බලපෑම් පිළිගන්නෙත් නැ ඕවා බොරු කියලා. මට කරුණු කොච්චර කීවත් පිළිගත්තේ නැ.ඒ දවස්වල අපි ටිකක් නහයට අහන්නේ නෑ නොවැ. මේ හාමුදුරුවෝ මට  කීවා අපි පොඩ්ඩක් එලියට ගිහින් කතා කරමු කියලා මමත් උන්වහන්සේත් එක්කම එලියට ගියා. දැන් අපි දෙන්නම එළියේ ඉඳගෙන කතාව වෙලාව දවල් 11 විතර ඇති. ටික වෙලාවකින් අපි දෙන්නටම හොඳටම දාඩිය දාල මුනත් කලුවෙලා ගිහින්. දැන් හාමුදුරුවො අහනවා

මොකද නිකන් මුනත් කලුවෙලා අමාරුවෙන් වගේ  

මම කීව ඇයි අප්පේ මෙතනට හොඳටම අවුව නොවැ 

එතකොට හාමුදුරුවෝ කියපි 
                         මහත්තයෝ ඉර කියන්නෙත් ජොතිශය අනුව එක ග්‍රහයෙක් ඉතින් මහත්තයාට ඇස්දෙකටම දැන් පේනවා නේද ග්‍රහයන්ගෙන් අපට බලපෑම් තියනවා කියලා. ඔය වගේ තමයි අනිත් ග්‍රහයෝත් උන්ගේ බලපෑම් අපිට පෙන්නේ නැ.ඒ උනාට නෑ කියලා අයින් කරන්න බෑ.   කතාව ඇත්ත  මට ඉතින් කට උත්තරත් නැ 

ඔන්න ඔයවගේ තමයි සමහර දේවල්. කොහොම උනත් මෙන්න මගේ කතාව. මේක මේ සත්‍ය සිද්දියක්. මේ කතාවට  සම්බන්ද අය සැහෙන පිරිසක් තවමත් අපේ ගමේ ඉන්නවා. 

      මම එතකොට උසස්පෙළ කරලා ගෙදර ඉන්න දවස් . ඒ දවස් වල තමයි ඔය කොම්පීතර සාස්තරේ ඉගනගන්න එහෙම ගියේ. දවසක් මම පන්ති ගිහින් ගෙදර ඇවිදින් පුරුදු විදිහටම බත් එහෙම කාල මගේ යාලුවෙකුත් එක්ක පුරුදු පරිදි බන්දුලගේ කඩේට යනවා හොරෙන් බට යක් ගහන්න. මෙන්න බොලේ එදා බටයක් ගහන්න යනකොට බන්දුලයා කඩේ නැ ඒ වෙනුවට හිටියේ උගේ අම්මා. 

මම ඇහුව "කෝ නැන්දා බන්දුල"  
"ඇයි පුතේ සිරිසේනට යකෙක් වැහිලනේ  ඔන්න එක බලන්න ගියා" කියලා නැන්දා කියපි . 
අම්මට සිරි මටත් මදිද   ඔය ටික  මමත් කෙළගෙන ගියේ ඔය කියපු තැනට . යනකොට එතන ගිනි විජ්ජුම්බරයයි සෙනග සූ ගාල පිරිලා. සිරිසේනව කාමරේක දමලා බොහොම අමාරුවෙන් අල්ලාගෙන ඉන්නවා. මිනිස්සු තුන් හතර  දෙනෙක් ඇඟ උඩ නැගලා අල්ලාගෙන ඉද්දිත් මේ යකා උන්ව පෙරලගෙන කාමරෙන් පැනලා යන්නයි ට්‍රයි එක.මේ අල්ලාගෙන ඉන්න අයත් එසේ මෙසේ කට්ටිය නෙවේ පොල් කඩන , ලී ඉරන කුලී වැඩ කරන අත පය යකඩ වගේ වෙච්චි මිනිස්සු   ටිකක් තමයි අල්ලාගෙන ඉන්නේ. ඇඳක දාලා සිරිසේනව යට කරගෙන අල්ලාගෙන ඉන්නවා  එක පාරට යටි ගිරියෙන් කෑ ගහල උන් ටික පෙරලගෙන යන්න ලැස්ති  මේ යකා. මමත් ඉතින් කාමරේ එලියට වෙලා ජනෙලෙකින්  බලාගෙන සිද්දිය. මට ඉතින් හරි විනෝදයි වැඩේ. ඔන්න ටික වෙලාවකින් අල්ලාගෙන හිටපු එක අයිය කෙනෙක් අවා එලියට . 

අම්මට හුඩු යකෝ මෙන්න මේ පොරගේ තොල පැලිලා , මුණ ඉදිමිලා මම ඇහුව මොකද අයිය ඔය කියල. පොර කියපි යකා වැහුණු සිරිසේනගේ ෂොට් තමයි ඔය කියලා.  මට පුදුමත් හිතුනා සිරිසේන කියන්නේ මේ හොඳටම වයසක මනුස්සයෙක් බොහොම පොඩි මිනිහෙක්. ඒ වගේ මිනිහෙක්ට කොහෙන්ද මෙහෙම හයියක්. මම ඇහුවා කොහොමද ඕක උනේ කියලා. ඔන්න එතකොට තමයි  මෙන්න මේ සිද්දිය දැන ගත්තේ.

     සිරිසේන  කියන්නේ අපේ ගමේ හිටපු එක යකදුරෙක් මිනිහා මේ ගෙදර ඊට කලින් දවසේ පොඩි සාන්ති කරුමයක් කරලා තියනවා ගෙදර කෙනෙකුට යක්ස බැල්මක් තියනවා කියලා. ඊට පහුවදා මේ ගෙදරින් යන්න කලින් ඇඟ පතේ අමාරුවට  පොඩි "නැටුම් තෙල් " ටිකක් එහෙම අරගෙන තමයි ගිහින් තියෙන්නේ. ඒ අතරේ තෙල් දාපු කරවල කැලී දෙක තුනක් කාල. මිනිහ ගෙදර යන්න කලින් හරකා බඳින්න කියලා ඇල ඉවුර දිගේ තනියම ගිහින් තියනවා. එතන තමා කලින් දවසේ සාන්ති කරුමය කරලා පිදේනි තටුව ගෙනත් දාලා තියෙන්නේ. ඔන්න ඔතනදි කලින් දවසේ පන්නපු යකා ගැහුවා ගුරාටම. මිනිහා හූ තියාගෙන පිදේනි තටුව කන්න දුවගෙන එනකොටම තමයි මේ ගෙදර අය දැකලා අල්ලාගෙන තියෙන්නේ . කියන විදිහට නම් බැරි වෙලාවත් පිදේනි තටුවේ දේවල් කෑවනම් සොරිම තමා ජීවිතේ උනත් විස්වාස නැතිලු එතකොට. 

අනේ මන් දන්නේ නැ මෙහෙමත් කෙලි. 

කොහොම හරි ඔන්න පොරව ගෙනත් දැන් කාමරේ . පොරගේ ට්‍රයි එක කොහොම හරි පිදේනි තටුව තියෙන තැනට යන්න. හිටි ගමන් හොඳට කතා කරනවා. අනුකම්පා හිතෙන විදිහට ඉල්ලනවා එලියට යන්න. එක එක හේතු කියනවා. දෙන්නේ නැති වෙනකොට කෑ ගහල ඉන්න එවුන් පෙරලගෙන දුවන්න හදනවා. 
ශේහ් බලන්න ලස්සනයි එතන තිබ්බ සෙල්ලම. කොහොම හරි ඔන්න විනාඩි දහයක් විතර මේ පොර දැන් සද්දයක් නැ. ඉන්න අයත් එක්ක හොඳින් කතා කරනවා. ඔහොම ඉඳලා කියපි මට චු බරයි කියලා. දැන් ඉතින් යන්න නොදී පුළුවන ඔන්න දෙතුන් දෙනෙක් මිනිහගෙන් අල්ලාගෙන එක්ක ගියා ගෙදර පිලිකන්නට. දැන් ඉතින් මිනිහ කියනවා අතාරපියවූ මට චූ කරන්න කියල. 
අනේ අත්හැරිය විතරයි මෙන්න බොලේ මු කඩාගෙන බිඳගෙන දුවනවා අර පිදේනි තටුව ලඟට. කොහොම හරි අපි පැනලා අල්ලගත්ත. අල්ලාගෙන ගෙනත් කාමරේට දාල දොරක් නැති නිසා තුන් හතර  දෙනෙක් දැන් මුර. ආයෙත් අර කලින් සෙල්ලමම තමයි. 
මමත් දැන් දොරකඩටම ගියා ගිහින් ඇතුලේ ඉන්න අයට කීව මම මෙයාව බලාගන්නම් ඔයාල එලියට එන්න කියලා. 
කට්ටිය අවා එලියට. 
මම දැන් උළුවස්සට හේත්තු  වෙලා. 
සිරිසේන ඇඳේ. 
දැන් මිනිහ මම දිහා බලනවා ජනේලෙන් එලිය බලනව. මට තේරුණා අයෙත් මොකක් හරි සෙල්ලමක් දාන්න තමා යන්නේ කියලා. මම කීව ඔන්න නොකීවයි කියන්න එපා සිරිසේන මේකෙන් එලියට යන්න ඕන නැති සෙල්ලන් දාන්න අවොත් නම් තමුසෙයි යකයි දෙන්නම මගෙන් හොඳටම කනවා . 
හදිස්සියකටවත් විටක් එහෙම හපන්න ඔය ඉතිරි වෙලා තියන දත් ටික ඕන නම් කරබාගෙන ඇතුලට වෙලා ඉන්නවා. මොනවා හරි ඕන නම් කියනවා ගෙනත් දෙන්නම් හැබයි සෙල්ලම් නම් දාන්න ලැස්ති වේලා  පස්සේ ඔං මමත් එක්ක තරහ වෙන්න එපා කියලා.  
යකා වැහිලා හිටියත් සිරිසේනගේ මොලේ නම් එච්චර අවුල් වෙලා නැ වගේ . නැත්නම් මාව හොඳට දන්න යකෙක් තමයි වැහිලා හිටියේ. මිනිහ පුස් පැටිය වගේ කීකරු උනා. මොකද ඒ වෙනකොට ඔය ගුටි කෙලි සම්බන්දව කුප්‍රකට නමක් තමයි මට තිබ්බේ. ළඟ පාත වලියක් නම් මම නැති වෙන්නෙම නැ. 
ඉස්කෝලේ ගිහින් ඉවර උනා විතරනේ තවම උන ගතිය බහින්න කාලයක් නැ නොවැ.  
කොහොම හරි දැන් ඉතින් මිනිහා මගෙත් එක්ක හොඳට කතාව මොන යකෙක්වත් නැති ගානට තමා  ඉන්නේ. 
මිනිහගේ පුතා ඒ දවස් වල සෙකියුරිටි කොම්පැනියක තමා වැඩ කලේ ගමට ආවොත් මගෙත් එක්ක සෙට් වෙලාම තමා යන්නේ. මිනිහා ඒවත් දන්නවා ඉතින් මිනිහා එයාගේ පුතා ගැනයි අනං මනං අහනවා. ඒ ගමන් හෙම්හිට මාව ශේප් කරගෙන එලියට පනින්නත් ටෝක් කරනවා. මම පොඩ්ඩක් සද්දේ දාපුවම අයෙත් වෙන මොනවා හරි කතා කරනවා. හැබැයි වැහිලා හිටියෙනම් රට කාපු හොඳ ගොරක යකෙක්. 

මිනිහගෙන් මොනවද ඕන කියල අහපු ගමන් ඉල්ලනේ බීඩි මම හිතන්නේ ඔය ටික වෙලාවට මිනිහා බීඩි මිටි 2 විතර බොන්න ඇති. පිස්සෝ බීඩි බොනවා වගේ තමයි මේ යකත් බීඩි බීවේ.  කාමරේ නිකන් රබර් රොටී වේලන දුම් කාමරයක් වගේ වෙලා තිබුනේ බීඩි දුමටම. 

කොහොම හරි ඔන්න පැයකින් දෙකකින් විතර මිනිහගේ ගුරුන්නාන්සේ අවා එතනට. එයත් අපේ ගේ ඉස්සරහ ඉන්න හොඳටම වයසක කෙනෙක් මනුස්සයනම් වයස උනාට හොඳ උස මහත මනුස්සය. හැබැයි ඇවිදින්න එහෙම ටිකක් අමාරුයි. 
අපු ගමන් කලේ ගොක් කොලයක්, කෝටු කැල්ලක්  හොයාගෙන එකෙන් පොඩි ත්‍රිශුලයක් වගේ එකක් හදපු එකයි. පස්සේ එක අරන් ගියා කලින් දවසේ හදලා තිබුන මල් පහන් පල  ලඟට. ගිහින්  එකට මොනවදෝ මතුරලා ගේනවා. ගෙනත් කාමරේ උළුවස්ස වටේට එක අරන් ගියා. පස්සේ එක මගේ අතට දීල කීවා දැන් ඔය යකාට  මේ දොරෙන් එලියට යන්න බැ ඒ නිසා ඔයා එලියට එන්න. මොනවා හරි කරන්න හැදුවොත් ඔය කොටුවෙන් ගහන්න කියලා.  මමත් ඉතින් එලියට ආව කෝකටත් මේ පොර ෂුවර්  නැති නිසා රේඩි පිට හිටියේ. 
මෙන්න බොලේ මම කාමරෙන් එලියට ආව විතරයි මු දැන් එනවා හෙමීට දොර ලඟට හැබැයි දොර ලඟට ආවට මු දොරෙන් එලියට එන්න බයයි. දොර ලඟට එනවා ආය ඇතුලට යනවා. ඔහොම සැහෙන වාර ගණනක් කරා. මිනිහට මේ උළුවස්ස පනින්න බැ. මම නිකන් ටෙස්ට් කරන්නත් එක්ක මට දුන්න කෝට්ට අරන් ලඟට ගියා විතරයි මෙන්න මේ යකා රිංගුවා ඇඳ ඇතුලට. මට ඉතින් පුල් ආතල් මේ වැඩ ටිකට.  
කොහොම හරි අපු ගුරුන්නාන්සේ අත්තා යකා එලවන්න තොවිලේට ඕන බඩු ටික ලියල දීල ගෙදර ගියා නාලා එහම රෑ වෙලා එන්නම් කියල. මමත් කෝටුව ගෙදර හිටපු කෙනෙකුට දීල ගෙදර ඇවිත් නාල එහෙම ටක් ගාල අපහු ගියා තොවිල් ගෙදර. ගිහින් තියන වැඩ ටික එහෙම ලැස්ති කරලා දැන් ඉන්නවා ගුරුන්නාන්සේ එනකන්. ඔන්න 6.30 -7 විතර වෙද්දී එනවා ගුරුන්නාන්සේ. දැන් ඉතින් තොවිලේ පටන් ගන්නයි යන්නේ. දැන් අයෙත් අර කෝටුවට  මතුරලා  මට කීවා ඕකෙන් එකක් යකාට  ගහල එක්ක එන්න කියලා. මමත් ගිහින් මේකෙන් පොඩි තට්ටුවක් දැම්ම. මෙන්න යකෝ මු දැන් කෝටුව පස්සෙන් එනවා එක්ක ඇවිත් ඉන්දුවා පහන් පල ළඟ පැදුරක ඒ කරලා දැන් ඉතින් තොවිලේ පටන් ගත්ත. යකා වැහුන සිරිසේනත් දැන් බීඩි බිබී බලාගෙන ඉන්නවා. මමත් මිනිහ කිට්ටුවට වෙලා ඉන්නවා අයෙත් මේ යකා දුවයිද  කියලා. කොහොම හරි ඔන්න දැන් රැ 11 ට විතර ඇති. 
අපේ ගුරුන්නාන්සේ අත්තා පාරේ ඇවිදින්න බැරිව ඉන්නේ නමුත් මෙන්න බොලේ සුදු සරම ඇඳලා උඩින් රතු පාට පච්චවඩම් රෙදි කෑල්ල ඇඳලා එක සීරුවට කොල්ලෙක් වගේ නටනවා. 
දැන් ඉතින් බෙරවල බීට් එක ටික ටික වැඩි වේගෙන එන්නේ. මතුරන සද්දෙත් ටික ටික වැඩ්යි. 
යකා වැහුන සිරිසේනත් දැන් ටිකක් නලියනවා. 
මෙන්න දැන් අර කෝටුව පහන් පලේ තිබිල අරගෙන අවා සිරිසේන ලඟට. මේ යකා දැන් කෝටුව පස්සේ යනවා. නිකන් නෙවී නට නටා. 
දැන් ඉතින් තොවිලේ උද්වෙගකරම හරිය. 
ගුරුන්නාන්සේ අත්තයි සිරිසෙනයි එක සීරුවට නටනවා. මේ යකා ඔලුව කරකවන විදිහට මට හිතුනේනම් ඔලුව ගැලවිලා විසිවෙයි කියලා. ඔය අස්සෙ තවත් ඔය වගේ බෙර සද්ද වලට ආවේශ වෙන අය ගම්වල ඉන්නවනේ උනුත් මෙතනට ඇවිත් නටනවා. තනිකර Musical  Show  එකක් වගේ. 
ඔන්න දැන් ගුරුන්නාන්සේ අත්ත සිරිසේනගේ ඇඟේ ඉන්න යකාගෙන් අහනවා මේ නරයා අතහැරලා යනවද කියල. යකා කියන්නේ නැ කියලමයි. දැන් ඉතින් තනිකර බිස්නස් එකක වගේ තමයි දෙන්න හෙට්ටු කරනවා. 
අරව දෙන්නම් , මේවා දෙන්නම් කියල මොනවා හරි පොඩි ජරාවක් දීල යකා එලව ගන්න ට්‍රයි එක. 
මොන පිස්සුද යකත් රට කපටියෙක් උ ඉල්ලනෙම  බිල්ලක් විදිහට පරානයක්. 
අත්තත් මොනවත්  නොදී එලව ගන්නම තමයි ට්‍රයි  එක. දැන් ඔං හොඳින් කියල බැරි තැන තර්ජනය කරනවා. යකත් මොන මොනවා හරි කියලා ශෙප් වෙනවා. වැඩේ හරියන්නෙම නැ. 
පස්සේ යකාට ගහන්න ලෑස්ති. මොකකින්ද දන්නවද ගහන්නේ පුවක් මලකින්. 
දැන් ඔන්න පුවක් මල දුන්න සිරිසේන අතට ගත්ත ගමන් මේ යකා එකෙන් තමන්ගේ මුනට ගහගෙන ගහගෙන යනවා.වගේ වගක් නැ.

          හැමෝම දන්නවනේ මේ හීනි කෙඳි වලින් ගහපුවාම වයිර පලු මතු වෙනවා කියල. මේ යකා පුවක්මල කැඩිලා කැලි විසිවෙනකන් ගහ ගත්ත මොන වයිර පළුවක් වත් නැ. අන්තිමට පුවක් මල වීසි උනා. මේක ගෙදර වහලෙටත් උඩින් ගිහින් මීටර් 100 විතර ඈත වැටුනේ. 
ඔන්න ගුටි කෑවට පස්සේ යකා ටිකාක් මෙල්ල වෙලා. දැන් මු කියනවා කුර තියන සතෙක් දුන්නොත් යනවලු. කොහොම හරි දැන් ගුරුන්නාන්සේ අත්තයි යකයි  හෙනට වාද කරනවා අපිට තේරෙන්නේ නැ මොකද කතාව දෙමල හරි මලයාලම් හරි තමයි. 

ඔය දෙවියන්ගේ බාසාවත් දෙමල කියනවනේ. (දිව්‍ය ලෝකේ  කොහොම ඇද්ද) . 

අන්තිමට දෙන්න හෙට්ටු කරලා කරලා එකඟ තත්වයකට ඇවිත්. මොකක්ද එකඟ තාවය කුකුලෙක් දුන්නොත් යකා යනවා. දැන් ඉතින් ඔන්න කලින් ගෙනත් තිබුන කුකුළා අරගෙන ආව. 
අනේ මේ අහිංසක සතා මෙලෝ දෙයක් දන්නවය. උගේ කකුල්  දෙක බැඳලා නිසා ඔහේ දාපු තැන වැටිලා ඉන්නවා. මට ඉතින් මේ වැඩේට හරි තරහයි.එත් ඉතින් කරන්න දෙයක් නෑනේ. හැබැයි මට හිතුනා  ඔයිට වැඩිය ලේසියෙන් මට ඔය යකාව එලවන්න පුළුවන් කියලා. කරන්න දෙයක් නැති නිසා කට වහගෙන බලාගෙන හිටියා. 
ඔන්න කුකුලා දැක්ක විතරයි සිරිසේන (යකා) කෙල හලනවා කුකුලට. ගුරුන්නාන්සේ අත්ත කුකුළා කකුල් දෙකෙන් එල්ලගෙන නටනවා යකත් පෙරේත කමට ඒ පස්සෙන් නට නටා යනවා. දැන් ඉතින් යකා යන්න එකඟයි. ඔන්න ගුරුන්නාන්සේ අත්තා කියපි එහෙම එක පාරටම යන්න බැ යන්න කලින් වැඩක් තියනවා කරලා දීල යන්න කියලා. 
යකත් දැන් හොඳටම මෙල්ල වෙලා නිසා එකඟ උනා වැඩේට. මොකක්ද  වැඩේ යන්න කලින් මේ තොවිලේ බලන්න ඇවිත් ඉන්න යට සාස්තර කියලා යන්න. ඔන්න දැන් තොවිලේ බලන්න ඇවිත් හිටපු එක එක්කෙනා ඇවිත් සාස්තර අහනවා යකත් උත්තර දෙනවා. වැඩියෙන්ම ආවේ ගැනු කට්ටිය තමා. 
ඔන්න ඒ වැඩේ ඉවර කරලා දෙන්න අයෙත් දෙමලෙන් මොන මොනවද කතා කරලා වැඩේ ඉවර කරන්න ලෑස්ත්යි.  ඔන්න සිරිසේන අතට දුන්න කුකුළා ගත්ත ගමන් ඔලුව වටේ රවුමක් කරකලා ගෙනාව බෙල්ල කට ලඟට කුකුලට කැ ගහන්නවත් වෙලාවක් නැ ටික වෙලාවකින් කුකුළා  විසි කරලා දාල සිරිසේන සිහිනැතුව වැටුනා. පස්සේ මිනිහ උස්සල පැදුරක තියලා වතුර ටිකක් එහෙම ඉහලා සිහිය ගත්ත.

 මෙන්න බොලේ සිහි අපු ගමන් පොර අහනවා ඇයි මොකද උනේ. මොකද මෙච්චර සෙනග කියලා. අනේ මන්ද පොර ඇත්තටම දන්නේ නැද්ද උනේ මොකද කියලා නැත්නම් බොරුවක්ද මට තවම හිතාගන්න බැ. 
කොහොම උනත් මේ කුකුලයි මල් බුලත් තට්ටුවයි වතුර පාරක් ලඟට ගිහින් දාන්න ඕන නිසා අපි එව්ව අරගෙන ගියා ඇල ලඟට මම තමයි කුකුළා අරගෙන ගියේ. මම හොඳට ලයිට් එකක් තියෙන තැනකට අරන් ගිහින් කුකුලව චෙක් කරා බෙල්ලේ පොඩි සිදුරු දෙකක් තිබුනා එච්චරයි කුකුලා ඇත්තටම මැරිලා. කුකුළා ඇල ලඟට අරන් යද්දී එතන හිටපු අයිය කෙනෙක් කීව ඕකගේ ඇඟේ එක ලේ බින්දුවක් නැ ඔක්කොම යකා බීල කියල. 
මමත් ඉතින් කියන දෙයක් ලේසියෙන් පිළිගන්නේ නැති පොරක් හින්දා   ඇල ලඟට අරන් ගියා කුකුළා එතැනදී  ඒ අයගේ ඉනේ තිබුන කිතුල් මල කපන පිහියෙන් කපලා බැලුව කතාව හරි උ ගම් කුකුලෙක් උනාට තනිකර සුදුමැලි වෙලා හිටියේ හරියට broiler කුකුලෙක් වගේ. 


ඉතින් ඔන්න ඕකයි සිද්දිය. ඔතන උන සමහර දේවල් අපේ පන්චේන්ද්රියන්ට ගෝචර නැ. එහෙම කියල බොරු කියන්නත් බැ ඇත්ත කියන්නත් බැ. 
කොහොම නමුත් මේක සංවාදයට විවෘතයි.  
අන්තිමට උනේ සිරිසේනව කාමරේ හිර කරගෙන හිටිය හින්ද ගමේ එවුන් ඔක්කොම මට වෙසමුනියා කියල කාඩ් එකක් ගැහුවා. පෙනුමත් ඒ වගේ නිසා මමත් ඉතින් කරබාගෙන හිටියා. 

ඔන්න මේක ලියල ඉවර උනෙත් යක්කු ගස් යන වෙලාවක. 
                                                                                              එහෙනම් හැමෝටම සුබ උදෑසනක් මම නිදා ගන්නවා ඔං .                       
                                                                  
       

Tuesday, October 25, 2011

රජ කාලේ කතා - රජතුමා, අවජාතකයා සහ හොරා





මේ ලියන්න යන්නෙත් ඔන්න ඉස්සර කලේ උන කතාවක්. මම ඔය පුරාතන දේවල් වලට කැමති නිසා ඕවා ටිකක් මතක  හිටිනවා. මම විතරක් නෙවේ මේ බ්ලොග් අවකාශයේ ඉන්න ගොඩක් අය කැමති පුරාතන දේවල් වලට කියල කතන්දර ලියල තියෙන මේ බ්ලොග් එකෙන් සහ කොමෙන්ට් වලින් පේන්නැද්ද බලන්න. මේක මේ අපේ රජ කෙනෙකුට උන වැඩක්. ඔන්න එහෙනම් එදා ඔය රාජ සබාවේ මම ඉන්නකොට ඇහෙන් දැකපු, කනෙන් අහපු  විදිහටම ඔන්න ලියනවා සිද්දිය. 

රජ පුරුෂයා :- අවසර පස්වාන් දහසකට බුදුවන්න දේවයන් වහන්ස.
රජ :- එහෙමයි. ! මොකාද යකෝ උඹ මේ කුදලලා අරන් ඇවිත් තියෙන්නේ.
ර.පු :- දේවයන් වහන්ස මේකා තමයි මේ ගම නියම්ගම්  පාලු කරමින් සොරකම්කරපු සොර දෙටුවා. මු මහා දවාලේනේව හොරකම් හැම එකක්ම සිද්ද කරලා තිබුනේ. සමහර දේවල් වලට හොරකම්ම කියන්නත් අමාරුයි දේවයන් වහන්ස. මු වැඩි හරියක් මිනිසුන් මුලා කරලා තමයි මේ සොරකම් සිද්ද කරලා තියෙන්නේ. වැඩේ කියන්නේ දේවයන් වහන්ස මු අතට  අහු උනත් මුගේ කපටිකමින්   අල්ල ගත්ත මිනිහගේත් ඉන ඉහ අතගාගෙන මරුවෙනාවනොව. 
හොරා :- ම්හු ...ම්මු ....ම්හු .......
ර :- මොකෝ බෝල මුගේ කටේ මේ රෙදි ගුලියක් හිර කරලා. මු හොරෙක් උනාට සරපයෙක් වගේ දස්ට කොරනවාය. ගලවපිය ඔය කටේ ඔබලා තියන රෙදි ගුලිය. 
ර.පු :- පස්වාන්දහසකට බුදුවන්න දේවයන් වහන්ස එකනම් කරන්න එපා ඔං.
ර :- ඒ මොකෑ බන් ඒ. 
ර.පු :- අවසර ..! ඕකගේ කට තමයි දේවයන්වහන්ස ඕකට තියන ලොකුම ආයුදේ. ඕක කට ඇරියත් ඕනෑම මිනිහෙක් ඕකගේ වචන වලට රැවටිලා ඕකා දෙන ලනු ගිලිනවා. ඒ හින්දම මම අල්ල ගත්තු ගමං වචනයක් වත් කතා කරන්න කලින් තමයි ඔය රෙදි ගුලිය කටේ එබුවේ. බැරිවෙලාවත් ඕක එබුවේ නැත්නම් ඕකා අනිවාරේයෙන් මාව ගොනාට අන්දලා මගේ ආයුද වලටත් ඇරලා තමයි මාරු වෙන්නේ. ගලවන්නනම් එපා දේවයන් වහන්ස. ගලෙවූවොත් ඕකා ඔබ වහන්සේගේ කනින් රිංගලා රාජ සබහවම ගොනාට අන්දලා මාරු වෙයි.
ර :- රජ පුරුෂය...! මොකක්ද තා කීවේ. මාව ගොනාට අන්දන්න. හිතුවා මදි තෝ  දන්නවාද   මගේ නුවන ගැන මුළු ලංකාද්වීපයේම ඇති ප්‍රසිද්දිය. වහාම ඔකාගේ   අත, පය  ලිහා ඔය මුකයේ ඔබා ඇති රෙදි ගුලිය ඉවත් කරනු. 
 ර.පු :-එහෙමයි දේවයන් වහන්ස ...එහෙමයි.
ර :- එම්බා සොර දෙටුව තා මේ කර ඇති අපරාද වලට තා නිවැරදි කරුද වැරදි කරුද.... ? 
හො :- පස්වාන්දහසකට  බුදුවන්න දේවයන් වහන්ස    නිවැරදි කරු වෙමි.
ර :- එම්බල රාජ පුරුෂය තෝ මෙම සොරාට විරුද්දව සාක්ෂි රැගෙන අවේද .? 
ර.පු :- එහෙමයි දේවයන් වහන්ස බොහොම අමාරුවෙන් පිරිසක් කැදවාගෙන අවා. බොහෝ දෙනෙක් තමාට උන සිදුවීම් කියන්නත් ලජ්ජාවෙන් ඉදිරිපත් වෙන්නේ නැ දේවයන් වහන්ස. ඔය ඉන්නේ ඒ කැදවාගෙන අපු පිරිසයි දේවයන්වහන්ස. 
ර. :- එම්බල නරයිනි මේ රජ පුරුෂයා කියන්නේ සැබෑවක්ද ?
පිරිස. :- ප. බු. දේ . එහෙමයි මු අපේ බොහෝ සම්පත් අපි බලාගෙන ඉංදීම කොල්ල කෑවා අපිව ගොනාට අන්දලා.
ර . :- එම්බල සොර දෙටුව තා මේ කර ඇති අපරාද සැකයක් නොමැතිව ඔප්පු වන හෙයින් තොපට මරණීය දණ්ඩනය නියම කරමි. නිදහසට කාරනා ඇතොත් වහාම ඉදිරිපත් කරනු.
හො. :- පෙනුමෙන්නම් එහෙම නැ එත් ඉතින් කාටද කියන්න පුළුවන්.
ර. :- කුමක්ද සොර දෙටුව තා මුනු මුනු ගාන්නේ. කියන දෙයක් සියලු දෙනාට ඇසෙන ලෙස කියව. කිමද තා මරණ බයින් තැති ගත්තේද ?
හො. :- අවසර රජතුමනි මේ පිරිස ඉදිරියේ කීවාට කමක් නැතිද. 
ර. :- මේ රාජ සබහවේ කිසිදු රහසක් නැති වහා කියපිය තෝ මුනු මනු ගමින් කිවූ දෙය.
හො. :- අවසර රජතුමනි මම පැවසුවේ       පෙනුමෙන්නම් එහෙම නැ එත් ඉතින් කාටද කියන්න පුළුවන්. කියලා දේවයන් වහන්ස .
ර. :-  මොකක්ද යකෝ එකේ තේරුම. කියන දෙයක් තේරුම් ඇතුව කියපිය. 
හො. :- එහෙමයි දේවයන් වහන්ස එහෙමයි. මම ඉපදුනු විගස මගේ  මෑණියන් නැකත් කරුවෙකු ලවා මගේ කේන්ද්‍රය සාදා ඇත. ඔහු කේන්ද්‍රය සදා දී පලාපල ද මෑණියන්ට පවසා ඇත. එම පලාපල වලින් කියැවුණු සෑම දෙයක්ම මේ වනවිට සත්‍ය වී ඇත. නමුත් ඔහුගේ අන්තිම පලාපල ය . ගැන මට අවිශ්වාස නිසා එලෙස ප්‍රකාශ කෙරුවෙමි.
ර. :- කුමක්ද ඔහුගේ අන්තිම පලා පලය. වහා කියපිය. 
හො. :- ඔහු මා සොර දෙටුවකු වනබවත් කවදා හො මිය යන්නේ අවජාතකයකු අතින් බවත් අවසානයේ කියා ඇත. මා සොරකු වූ බවනම් සත්‍ය වී ඇත. නමුත්  අව්ජාතකයකු  අතින් මැරෙන බව කීම නිසයි    පෙනුමෙන්නම් එහෙම නැ එත් ඉතින් කාටද කියන්න පුළුවන්. යයි කියා සිටියේ දේවයන් වහන්ස.

ර. :- එම්බා රාජ පුරුෂය වහාම මේ බල්ලා මේ නුවරින් පිටුවහල් කරව. තොපි ගෙනාවොත් ගේන්නේ මේ වගේ දහාපදුරාවක් තමයි.

කතාව නිමි 

ප. ලි 
මෙම වෙබ් අඩවියේ කොමෙන්ට් වැටීම 1,110 :  10 අනුපාතයට සිටින ලෙස සකසා ඇති බැවින් කරුණාකර එම අනුපාතය කැඩීමෙන් වලකින්න.    

Saturday, October 22, 2011

පාසල් සමයේ සුන්දර සිදුවීම් - සිකුරිටි මාමල ඇන්දීම සහ සංවරව ප්‍රේම කිරීම

ඔන්න අද මම කියන්න යන්නේ සිකුරුට්ටෙක් සිරාවටම ගොනාට අන්දපු සිද්දියක් ගැන. මේක සිද්ද උනේ ඉස්කෝලේ යන කාලේ. මම ඉස්කෝලේ ගියේ මාලිගාව තියන නගරයේ ප්‍රසිද්දම  පාසලකට ඔං.


හැබැයි  ඉතින් ඉස්කෝලේ  ගියා කීවට සතියට දවස් 3 විතර තමයි ගියේ. අද ගියොත් හෙට බෑ ක්‍රමයට තමයි. ඉස්කෝලේ නොගියත් මොන හේතුවකටවත් පන්ති යන එකනම් නැවැත්තුවේ නැ . මොකද මම ගියේ පිරිමි ඉස්කොලේකට   නිසා කෑල්ල හම්බෙන්න අනිවා class යන්නම වෙනවා.
             ඉඳල හිටලා ඉතින් ඔය කොහේ හරි ට්‍රිප් එකක් ගියොත් මිසක් අපිට සති අන්තේ කතා කරන්න යන්න තිබ්බ ලේසිම, ලාබම තැන  තමයි මහ රැජිනගේ මල් වත්ත. සමහර දවස් වලට උදේ   8-10 class ඉවර උනාම ආය class හවස 2-4 තමයි තියෙන්නේ. එතකන් දවල්ට ගේන කෑම එක කාල Chat එකක දාගෙන ඉන්න හොඳම තැන තමයි ඔතන. ඒ දවස් වල ඕක ඇතුලට යන්න ගන්න තිබ්බ ටිකට් එක රු 5/= යි. ටිකට් එකත් අරන් එළියේ කඩේකින් කඩල, ටිපි ටිප්, අයිස් ක්‍රීම් වගේ දෙයකුත් අරන් ඇතුලට යනවා. ඒ කරලා කොහේ හරි මුල්ලක තියන බංකුවක හරි බැම්මක හරි ඉඳගෙන කයිය ගහන එක තමයි වැඩේ ඔය අතරේ ඔය පොඩි පොඩි උම්මා එහෙමත් හුවමාරු වෙනවා.


ඔය පාර්ක් එකේ හිටියා සිකුරිටි සෙට් එකක්  මහ එපා කරපු එවුන් ටිකක් මුන් විසිල් එකකුත් අතේ තියාගෙන පාර්ක් එක පුරාම ඇවිදින එක තමයි වැඩේ බැරි වෙලාවත් කපල් එකක් කරට අතදාගෙන තුරුළු වෙලා හිටියොත් ඉවරම තමා. විසිල් එක ගහලා අනිත් අය ගෙන්නලා ජෝඩුව කොහොම හරි එලියට දානවා.
          උන් නිකන් හිටියේ ඒ වයස උන් පහුකරලා අපු නැති එවුන් වගේ. මට මේකට මල පැනලා හිටියේ එත් කරන්න දෙයක් නෑ යන්න තියන එකම තැන මෙතන විතරනේ. ඔය Park එකේ මම හැමදාම ගියොත් ඉන්න තැනක් තියනවා  එතන වෙන කවුරුත් හිටියේ නැත්නම්  මම එතනම තමයි ඉන්නේ.


දවසක් අපි දෙන්න කුඩේකුත් ඉහලාගෙන ඔතන ඉඳගෙන ඉද්දි මට ඇහුන විසිල් සද්දයක් මම ගණන් ගත්තේ නැ.  මෙන්න බොලේ මේ මීහරකෙක් එකපාරට මෙතනට කඩා පැනලා කුඩෙත් ඇදලා විසිකරලා මට ලෙඩේ අදිනවා. මට මල පැන්නේ පොකුරු පොකුරු. අන්තිමට මුන් පොලිසියට call කරන්න ලැස්ති. පොලිසි  ගියත් වැඩේ ලෙඩේ වන නිසා මම උපක්‍රම ශීලීව පසු බැස්ස. හිටපන් දෙන්නම් ජම්බු කියල හිත හද්දගෙන කෙන්න්තියෙන් පුපුරා   පුපුරා   අවා එලියට.


මම දැන් කල්පනා කරන්නෙම මුන් කරපු මේ වැඩේට ගේමක් දෙන්නේ කොහොමද කියලා. නින්ද යන්නෙත් නැ කන දෙයක් ඇඟට අල්ලන්නෙත්  නැ මට කරපු අපහසෙමයි මතක් වෙන්නේ. ඒ මදිවට කෙල්ල එන්නෙත් නැ කොහෙවත් යන්න. අයි අප්පා විලිලජ්ජහවේ පන ගියානේ එදා. කොහොම හරි මාස දෙකක් විතර ගියා මොනවත් කරන්න හම්බුනේ නැ. දැන් ආපහු ඔක්කොම කූල් . අයෙත් අපි දෙන්න පාර්ක් එකට යන්න ගත්තා. කොහොම උනත් ඇම්ගේ තරහ අඩු වෙලා තිබුනේ නෑ. ඔහොම ඉන්නකොට එක දවසක් අවා මරු අයිඩියා එකක්.


එක දවසක් පන්තියේ කොල්ලෝ සෙට් එකටම මම කීව අද මම ගානේ පොඩි පාර්ටි  එකක් දෙනවා ඔක්කොම වරෙල්ල පාර්ක් එකට කියල. අපේ එවුනුත් කන්න දෙනවනම් කොන්ක්‍රීට් හරි කන එවුන්නේ සෙට් එකම ආවේ නැතැ පාර්ක් එකට


 මම හෙමීට කෑල්ලත්  එක්ක වෙනදා වගේම ආව පාර්ක් එකට. ඇවිත් පුරුදු තැනම ඉඳගත්ත. මගෙත් එක්ක බෝඩිමේ එකට ඉන්න එකාට සල්ලි දීල කොල්ලන්ට කන්න අරන් දීල කරන්න ඕන වැඩේ කියලා තිබ්බේ.


උන් දැන් ඇවිත් එක එක තැන් වල සෙට් වෙලා ඉන්නවා.
මම හෙමීට මගේ කෙල්ලව මගේ රූමාගේ  කෙල්ල ඉන්න තැනට යවලා රූමා මම ඉන්න තැනට ගෙන්න ගත්ත.


දැන් අපි දෙන්න වෙනද අපි කපල් එක ඉන්න තැන ඉඳගෙන ඉන්නවා කරට අත දාගෙන කුඩේකුත් ඉහලාගෙන හොඳටම ගුලි වෙලා.


හිතුව  හරි මෙන්න බොලේ අර සිකුරුට්ටා කෙළගෙන එනවා අපි ඉන්න තැනට ඒ විතරක්නම් මදැ     මු විසිල් එකත් ගහගෙන ඇත ඉඳලම කැ ගහගෙන එනවා " මම එදත් කීවනේ තමුසෙලා දෙන්නට මේක මඟුල් නටන තැනක් නෙවේ කියලා. අදනම් තමුසෙලා දෙන්න යවනවා පොලීසියටම. තමුසෙලාට සැරයක් කීවහම සිංහල තේරෙන්නේ නැනේ. " කියල.


අපි දෙන්න කිසි සද්දයක් නැ කරට අත දාගෙන පාඩුවේ ඉඳගෙන ඉන්නවා. මෙන්න බොලේ මු අපු ගමන් කුඩේ ඇදල විසි කරා. මලා යකෝ කුඩේ ඇතුලේ කොල්ලෝ දෙන්නෙක් මුට කට උත්තර නැ. අපි දෙන්නත් ඒ දවස්වල ඉඳන් යෝදයෝ වගේ තමා පෙනුම. දෙන්නම නැගිට්ට නැගිටලා දැන් ගේම ඉල්ලනවා. අපි අහනව අයි කොල්ලෝ දෙන්නෙකුට එක ළඟ ඉඳගෙන ඉන්න බැරිද.


සික්කට කරගන්න දෙයක් නැ.
උගේ සපෝර්ට් එකට අපු අනිත් එවුන්ටත් කට උත්තර නැ. මෙන්න බොලේ එතකොටම හතර වටෙන්ම එනවා එල හූ වක්. අප දෙන්නටත් ෆිට්. අපි ඉතින් දැන් කොක්කටම ටම සෙට් වෙන්නේ. ඒ දවස්වල තිබුන උනේ හැටියට ගහගන්නවා ගුටිකනව කියන්නේ මේ කනවා නිදාගන්නවා වගේ සරල දේවල්නේ.


කොහොමහරි එදා මුළු පාර්ක්  එකේම හිටපු ඔක්කොම ඇවිත් මෙතනට. හැමෝම බනිනවා සික්කන්ට මොකද ඔක්කොම කොල්ලෝ කෙල්ලෝ තමයි හිටියේ. (ඇත්තටම මේ පාර්ක් එකට කපල් ඇරෙන්න නිකන් මිනිස්සු   එනවා හරිම අඩුයි.)   සික්කෝ ටික කරබාගෙන අකුලාගෙන ගියා. අපිත් ඉතින් වීරයෝ වගේ පොඩි සද්ද ටිකක් දාල අපහු calss  ගියා. හැබැයි එදා ඉඳල පාර්ක් එකට ගියහම ටිකක් පිළිවෙලට තමයි හිටියේ. ඒ වගේම සික්කන්ගේ තිබුන කරදරෙත් ටිකක් විතර අඩු උනා. දැන්නම් මතක් වෙනකොටත් හිනා.



Monday, October 17, 2011

නොබැඳි ජාතීන්ගේ දැනගැනීම සඳහායි





මිනිසෙකු පරිපුරන මිනිසෙකු වීමට නම් ගසක් සිටු වීමත් ,දරුවකු හැදීමත්, පොතක් ලිවීමත් කලයුතු යයි චීන කියමනක් ඇත. නමුත් කසාද බැඳිය යුතුයැයි කියා නැත. එක පාරට මෙහෙම හිතුනේ මට පොඩි නිවාඩුවක් ලැබුණු නිසාය. කොලේ බැන්ද හරකා සේ උදේ වැඩටත් හවස ගෙදරටත් දින චරියාවේ එල්ලී සිටි මට එක  දිනක් සම්පුර්ණ යෙන් නිදහසේ ගත කිරීම‍ට ලැබුණු සතුටෙන් උද්දාමය ට පත් වී  මෙසේ ලිවීමට සිතුනේ. එදින ඇසුව සින්දුවක් නිසාමය. බොහෝ වාර ගණනක් මේ ය මීට පෙර අසා ඇති නමුත් එහි අර්ථය පිලිබඳ මා එතරම් සැලකිලිමත් නොවුනෙමි. නමුත් අද දිනයේ මනෝ පාරක් ගහගෙන ඉන්න විට මෙය ඇසීමේදී මට නැවත අතීතයට යාමට පුළුවන් වූ නිසා නොබැඳි ජාතින් කෙරේ අනුකම්පාවෙන් මෙසේ ලියා සිටිමි. සමහරුන්ට ඇසීමේ දෝෂ ඇති නිසා,  කියවා බැලීමටත්, නොතේරෙන යමක් ඇත්නම් එය තේරුම් කර ගැනීමටත් මට ඇසුණු ලෙස සින්දුව ඔන්න පහලින් ලීවෙමි. කසාද නොබැන්දෝ වෙත ඊරිසියා කිරීමෙන් පලක් නැත.( වාසනාවට ගෙදර උන්දෑට කොම්පීතරේ ගැන මල පොතේ අකුරක් බැරිය).   සෙනසුරු අපලය ලැබුවදා විෂ්ණු දෙවියොත් බට කොළ කෑවානම් අපි වැනි නරයන් ගැන කවර කතාද. (ඇඩෙනවා අප්පා)

සින්දුව ගන්න මෙතනින්





එක යායේ කකාවැටි- එකා වගේ එකට හිටී 
එක පවුලේ උපන් ලෙසේ කල ආරක්සා ...
නාස් ලනුව දමනවාලු - කරත්තයක බදිනවාලු 
අපට හිටිය ලපටි කැකුළු නාඹර වස්සා....

ගෙට ආ කල ටිකිරිලියා - නුඹ වේවිලු කබර ගොයා
ලිඳට ගියත් අවසරයක් ගන්නට වෙවී 
දල ගලවා අතේ තියා - නුඹ නටවයි ඒ ළමයා 
පනවාලා දරුණු දණ්ඩ බන්ධන නීති .......

වලට වැටුණු එකා යකා - වලටම ඇද ගනු මිසකා 
වලෙන් උඩට එන්නට ඇත දෙන්නට කැමති 
නැදැ හිතවතෙකු නැති - ඒ ගැන හිතුවොත් යෙහෙකි 
කසාදෙනම් කසාය  හරි තිත්ත බෙහෙතකී ....

(ගායනය : සුනිල් එදිරිසිංහ සමග බන්දුල විජේවීර )

පළමු කොටසින් කියන හරිය ඕනෑම කෙනෙකුට තේරුම් ගත හැකිය. එතනදී  නාඹර වස්සා.... යයි කීවේ කරන්න යන හරක් වැඩේ ගැන හිතා නොවන බව දැනගත යුතුය. තරුණ වස්සෙක් යනු නිදහස උපරිමයට බුක්ති විඳින්නෙකි ඕනෑම හුඹහකට ඇනිමටත්, ඕනෑම වත්තකට පැනීමටත් දෙවරක් හිතන්නේ  නැත. සියලු සෙල්ලම් ඉවර වන්නේ ටිකිරිලියා  ගෙට ආ පසුය එතෙක් ගෙදර සියලු දෙනාට තරුණ කමේ දල පෙන්වමින් නයකු සේ සිටින්නා නිකම්ම නිකම් කබරයකු බවට පත්වේ. මෙතනදී කබරයා කිවේ ඕනෑම දෙයකට ඔරොත්තු දෙන විදිහට හැදෙන බව කීමටය. කබරයාගේ හම රළුය ඕනෑම ජරාවක් කෑමට හැකිය, කොච්චර ගැහුවත් නොදැනෙන ලෙසට මාරු වී යාමේ හැකියාව හොඳින්  ඇත.  නැ හිත මිතුරන් කොපමණ මේ වලේ වැටුනත් උඩ ඉන්න අය‍ට කිසිදින වලට පනින්න  එපා යයි කියන්නේ නැත        
එකට හේතුව මේකය කසාදෙ තිත්ත උනත් කසාය වැනි බෙහෙතකි. අමාරුවෙන් හරි බී ඉවසා සිටින්නෝ අවසානයේ සුවපත් වෙන්නෝය. 

තව දෙයක් කිව යුතුය සාර්ථක විවාහ ජීවිතයකට මා දෙන උපදෙසනම් එක්කෝ ඔබ බිහිරි විය යුතුය නැතිනම් බිරිඳ ගොළු විය යුතුය.  



Sunday, October 9, 2011

රජ කාලේ sex කතා - අතිශයින්ම වැඩිහිටියන්ට පමණයි

වයස හරිනම් කියවලාම යන්න 






ඔන්න හැමදාම එක එක්කනාට මඩ ගහ ගහ ඉන්නේ නැතුව හිනාවෙන්න පුළුවන් දෙයක් ගෙනාවා . මට නම් මේක අහනකොට හිනා ගියා එත් කියවනකොට හිනා යයිද කියල මම දන්නේ නෑ. හිනා යන්නේ නැත්නම් ඉතින් විලාප දීල අඬන්න වෙන ඉතින් අහවල් දෙයක් කරන්නද ?

මේක මේ රජ කාලේ කතන්දරයක්. බනින නම් එපා කුණුහරුප කියනවා කියල මේකෙන් කියන දේ හරියට තේරුම් ගන්න බලන්න. සමහරු නම් දැනටමත් අහල ඇති.  ඔන්න එහෙනම් මේකයි කතාව. 

හැමෝම දන්නවනේ අද වගේම එදා හිටිය රජවරුන්නටත් හිටිය කවටයෙක් කියල කෙනෙක් . හැබයි අද වගේ නෙවේ එදා හිටිය රජවරුන්න්ට හිටියේ එක කවටයි. අර හැම කතාවකම හිටිය බ්‍රහ්මදත්ත රජතුමා වගේ හැම රජතුමෙකුටම හිටිය මේ කවටයට කිවේ අන්දරේ කියල.මම හිතන්නේ මේ අන්දරේ කියන්නේ තනතුරක් කියලයි. කොහොම උනත් අන්දරේගේ ප්‍රධාන  ඩියුටි එක තමයි රජතුමා අන්දන එක. රජ තුමාත් ඉතින් ඇඳගන්න බලා ගෙන හිටියේ. ඔන්න දවස රජ තුමත් අන්න්දරෙත් අතර මෙන්න මෙහෙම කතා බහක් ඇතිවෙනවා. 

ර :- අන්දරේ මම හිතා ගෙන ඉන්නේ අද නිවාඩු දවසක් නිසා පොඩ්ඩක් ඇවිදින්න යන්න. අපේ බිසවුන් වහන්සේත් මට ටික දවසක ඉඳලා කරදර කරනවා නගරය පැත්තේ  යන්න ඕන කියලා. අද මම හිතාගෙන ඉන්නේ රාජකීය උයන මැදින් නගරයට යනකම් ඇවිදගෙන යන්න ඒ හැටි දුරකුත්  නැ නොවැ.
අ :- එහෙමයිදෙවයන් වහන්ස. ඉඳල හිටලා හරි ඔබතුමා  ඔය විදිහට ඇවිදින්න යන එකනම් ඔබ තුමාගේ සරීර සනීපයට ඉතාම යහපත්. එහෙනම් ඔබ වහන්සේ අද දේවියත් එක්ක ඇවිදින්න යන්න. මමත් ගෙදර ගිහින් නිවාඩු දවසේ නාල කාල ටිකක් විවේකිව ඉන්නම්.
ර :- හොඳයි අන්දරේ අපිත්  දැන් පිටත් වෙනවා අන්දරේටත් අපිත්  එක්කම ගියහැකි. ඔය එන්නේ දේවියත් ලැස්ති වෙලා. 
අ :- (ශා.. අදනම් දේවිය නිකන් ගින්දර වගේ. මේ යකා ඕක මම ගන්න යනකොටම පැහැර ගත්තනේ. තාමත් ඔකිගේ හිතේ තියෙන්නේ මම ගැනම තමයි. දවස් කීයක් මම එනකොට  අන්තහ්පුරේ කවුළුවෙන් බලාගෙන හිටියද ? කොහෙද කුඹයෙකුටවත් ඕකට රිංගන්න පුළුවන්ය යන්න එන්න තියන එකම පාර තියෙන්නෙත් මේ යකාගේ කාමරේ ලගින්. නාකි වෙලත් තාම කාම තණ්හාව නම් අඩු නැ. )
දේ :- (මේ නාකියත් එක්ක දීග යන්න උනේ මගේ කරුමෙටද කොහෙද ? අන්දරේ මොන තරම් හැඩද ?මේ මෝඩයත් ටැක් ගැහි ගැහී හිටිය නේ ඉක්මන් උනානම් මෙලහටත් මම අන්දරෙගේනේ . මගේම කරුමේ )
..........
ර :- අන්දරේ මම හිතාගෙන ඉන්නේ මේ උයනට තව පොකුණක් ඉදි කරන්න අර කෙලවරේ තියන කොස්  ගස් ටික කපලා එතන හැදුවොත් හොඳයි  කියල හිතෙනවා. ඒ හරිය හොඳටම කැලා වෙලා. කෝ මේ උයන් පල්ලෝ .
අ :- අද නිවාඩු දවස හින්ඳ උයන් පල්ලෝ නැ රජතුමනි . කොහොමටත් මුන්ගෙන් වැඩක් හරියට කරගන්න නම් හැම වෙලේම හොයලා බලන්න ඕන.
..........
දේ :- අප්පේ මොකක්ද මේ එන සුවඳ ?
ර :- මටත් දැනුන. හැබැටම අන්දරේ මොකක්ද මේ සුවඳ ?
අ :- මේකනම් වරකා ගෙඩියක සුවඳ. අනිවාර්යෙන් අර පැණි වරකා ගහේ  ගෙඩියක් ඉදිලා සතෙක් කනවා ඇති. මම හිතන්නේ අපේ කිරිඅත්ත මැරුම් කන්න ගියේ ඔය ඔය ගහේ වරකා කලා වෙන්න ඕන.
අ :- අර තියෙන්නේ මම කිවේ මේ ගහේ වරකා තරම් රස වරකා මම හිතන්නේ රටේ වෙන කොහෙවත් නැ කියල. මේ වරකා පැල ටික ඔබ තුමාගේ මී මුත්තට බ්‍රහ්මදත්ත රජතුමනේ එවුවේ. අපේ කරුමෙට ඒ ගෙඩිය තියෙන්නේ ලේසියෙන් කඩන්න පුළුවන් තැනක නෙවේ. ඒ මදිවට මොකෙක් හරි සතෙක් එක කන්න අරන් වගේ.
ර :- අන්දරේ කොහොමද මේ වරකා ගෙඩිය කඩන්නේ . අපි නගරයට ගිහින් එනකොට මේක සත්තු කාල තියෙයි . බලන්න ලඟපාත කවුරු හරි ඉන්නවද කියලා. 
අ:- ඔහේ නෑ රජතුමනි අද නිවාඩු දවස හින්දා කිසිම කෙනෙක් පෙන්න නැ . හිටියත් ගහකට යවන්න තිය පයින් යන්නවත් පුළුවන් විදිහට අද ඉන්නේ නැ.ඔක්කොම එවුන් කන සාක්කුවේ දමාගෙන ඇති. 
දේ :- අපරාදේ මගේ කටට කෙලත් ඉනුවා මේ සුවඳට. රස දෙයක් කන්න පින නැ නේ මට. 
අ :- දේවිය මේ කියන්නේ වරකා ගැනද ? නත්නම්ම්ම්ම්ම් ....
අ :- කමක් නැ රජතුමනි දේවියත් කියන නිසා මම කොහොම හරි වරකා ගෙඩිය කඩලා දෙන්න බලන්නම්. කාලෙකින් ගහකට නැග්ගේත් නැ.දැන් පුරුදුත් නැ වගේ. 
..........
දේ :-  අනේ අන්දරේ පරෙස්සමෙන්.
..........
අ:- හී.. හී ... හී .........හු ....හ .....හ ....හ @ ...!
ර :- මොකද අන්දරේ පිස්සු හැදිලා වගේ හිනාවෙන්නේ. ගහට නැග්ගම තමුසෙට මොකක්ද හැදුන පිස්සුව.
අ:- හී.. හී ... හී .........හු ....හ .....හ ....හ @ ...!
ර :- කතා  කරනවා මිනිහෝ.
අ:- රජතුමනි ...හී.. හී ... හී .........හු ....හ .....හ ....හ @ ...!
ර:- පිස්සුද ඔයි මොකද තමුසෙට උනේ කතා කරනවා මගේ යකා අවුස්සන්නේ  නැතිව.
අ:- රජතුමනි හී.. හී ... හී .........හු ....හ .....හ ....හ කියන්නේ කොහොමද අප්පා. හි ..හී මට ලැජ්ජයි හි හි 
ර :- අන්දරේ මට යකා නග්ගවන්නේ නැතිව කියනවා මොකද උනේ කියල.
අ :- රජ තුමනි
ර :- ඔවු ඉතින් 
අ:- රජතුමනි හි.. හී .අනේ මන්ද කොහොම කියන්නද අප්පා හි .....හී .....
අ :- රජතුමනි මට පේනවා ..හි...හී.. මට පේනවා ඔබතුමා.....
ර :- ඔවු ඉතින් මම 
අ:- ඔබතුමා .....ඔබතුමා හි..හි.. සිරියහන් ගබඩාවේ කරන වැඩ දේවියත් එක්ක මෙතන කරනවා .....හී හී .........
ර:- අන්දරේ තමුසෙට ඔල්මාදෙද. මම මේ හිටිය වගේ ඉන්නේ. මේ උයන මැද. පිස්සුද තමුසෙට. 
අ:- දෙයියම් පල්ලා රජතුමනි මෙතනට ආපුවම මට පේනවා හි..හී හී .........
ර:- මොකාක්ද තමුසේ කියන්නේ . බහිනවා ඉක්මනට . බහිනවා ... මට බලන්න ඕන මේ කියන එකේ ඇත්ත නැත්ත. හැබයි බොරුවක් කියල තිබුනොත් ....දන්නවනේ රාජ උදහස.
අ :- හා ඔබතුමාම  නැගල බලන්න හි හී 
...........
ර:- හි...හී ...හූ ....හූ ...හී ..හී @....# ...!
අ:- ඇයි රජතුමනි ඔබතුමා හිනාවෙන්නේ 
ර:- හි...හී ...හූ ....හූ ...හී ..හී @....# ...! මාරයි බන් හි.. හී 
අ:- ඇයි රජතුමනි මොකාක්ද ඔබතුමා දැක්කේ 
ර :- හි..හී අනේ බන් උඹ ....උඹ අපේ දේවියත් එක්ක හී ...හී 
අ :- ඉතින් මොකක්ද මම දේවියත් එක්ක..
ර :-හී...හී...හි උඹ දේවියත් එක්ක ....හි ...හි....හීඉ මට ලැජ්ජයි බන්...හි...හී .. උඹ දැකපු දේම තමයි 

ඉතුරු ටික කිවන්නා සතුය. 
ඇනුම් බැනුම් ගල් මල් පහතින්  දමල යන්න තව මොනවා හරි ලියන්න හිතෙන්නේ එතකොට  තමයි.